ده ملخص لمناظرة دارت بينى وبين 3 ظباط شرطة عسكرية أحدهم برتبة رائد ، واتنين برتبة نقيب ،أمام س 28 امبارح بعد خروج حسام الحملاوى من التحقيق !
ملحوظة ممكن البعض يشوف انى كنت متخاذل فى الرد ومطولتش الجدال بس أنا مكانش هدفى انى أغير قناعاتهم ، أنا بس كنت عايز أفهم دماغهم وردودهم على كل حاجة ازاى ! ومكنتش عاوزينقطع الحديث خاصة ان كان فيه عميد واقف على بعد أمتار مننا ! وكمان أغلب النشطاء كانوا روحوا ومكانش ليا نفس أدخل أشرب شاى جوه لو قفشت معاهم !
ملحوظة : أنا عملت حركة خبيثة انى فتحت الكاميرا وسجلت الحوار والكاميرا موجهة لرجلهم ، بس تراجعت عن اذاعة التسجيل لأنه ممكن يضرهم والناس مأذونيش فى حاجة بالعكس كانوا محترمين جدا
بدأ الحوار لما لاحظت وقوف 3 شباب مع نقيبى شرطة عسكرية ، وانضم الرائد بعد انضمامى للحوار ، والحوار بدأ من هنا :
اللى داخلين دول مجرمين ، انتوا متعرفوش احنا بنمسك ايه ، اللى بلطجه ولا سرقه بالاكراه واللى سلاح متهرب واللى عايز يولع البلد ، انما المحترم هنيجى جنبه ليه ؟!
طيب مع احترامى لرأى حضرتك ماهى الجرايم دى كانت موجودة أيام مبارك ، وكانت بتحاكم قدام محاكم مدنية ، والبلطجية دول مواطنين ومن حقهم يتحاكموا قدام محاكم مدنية و...
أيوه كانت موجودة بس مش بالعدد ده والبلد مكانتش فى الظروف دى ،والمحاكم المدنية عقوباتها ضعيفة متنفعش مع وضع البلد اليومين دول ، وبعدين الشرطة بيرموا علينا دلوقتى ويريحوا دماغهم ، عارف النيابة اللى فوق دول مبيروحوش أصلا ! كل واحد بدل ما كان بيمسك قضية واحدة تقعد 3 ولا 6 شهور النهارده بيبقى قدامه 10 قضايا فى اليوم ! احنا مطحونين بس ده واجبنا ..
طيب لو المجلس العسكرى شايف ان العقوبات ضعيفة يشددها هو مش واخد حق اصدار قوانين دلوقتى ؟ لأن الماكمة العسكرية للمدنى فى حد ذاتها ظلم ، لأن مهما كان المحاكم المدنية ليها طبيعة والعسكرية ليها طبيعة تانية خالص زى الفرق بين الحياة المدنية والحياة العسكرية ! وبعدين ايه يضمن ان مفيش برىء يتحبس ؟ وفيه حالات كتير اتحبسوا ظلم وبعدهم صدرت قرارات باعادة المحاكمة وولاحس ولا خبر لغاية دلوقتى
ماهو اعادة محاكمة دى يعنى عايزه يخرج بكره ؟ مش فيه اجراءات ؟! بقولك كل واحد بيشوف عشر قضايا فى اليوم ! ولاهم عشان صحابكم ؟ طب ماتبص للأمان اللى الشعب بيطالب بيه مش واجبنا نحققه ؟ ولو اضطرينا نضحى بحاجات بسيطة ونستحمل عشان الأمن يرجع مش تستاهل ؟
لا مع احترامى لرأى حضرتك مش مستعدين نضحى بحريتنا عشان الأمن لأن الاتنين ليهم طريق واحد ، واحنا خايفين اصلا من سيناريو 54 أو الجزائر وباكستان ..
لالالا ده كلام فاضى ! أنت اسمك ايه ؟ ... بص يا أحمد .. لو الجيش عايز السلطة كان ايه اللى يمنعه ؟! كان من يوم 10 فبراير لما طلع البيان كان قال انا اللى هحكم وانقلاب عسكرى وأحكام عرفية يا معلم واللى يتكلم يتجاب ، مفيش الكلام ده !
طب هو احنا جايين هنا ليه يافندم النهارده ؟ مش عشان اللى بيتكلم بيتجاب ؟!
ياراجل ! دول كانوا قاعدين فى التكييف فوق بيشربوا قهوة ويدردشوا معاهم ! وانتوا اللى اتنبح صوتكم هنا واتسلقتوا واحنا معاكوا فى الشمس !
طيب النهارده اتنشر على موقع السى ان ان - وممكن اجيبهالك على الموبايل لو حبيت تتاكد- اعتراف لوا بارز فى الجيش ان المعتقلات فى 9 مارس اتعملهم فحص عذرية على ايد دكتور والعساكر كانوا واقفين وبيقول اننا عملنا كده عشان ميرجعوش يقولوا الجيش اغتصبهم ! وان ولا واحده منهم كانت عذراء أصلا !
بص أنا أساسا عن نفسى مبصدقش أى قناة فى العالم دى دماغى ، بس لو افترضنا ان اللى بتقوله ده صحيح هو أى واحدة لو قالت اغتصبونى دلوقتى ايه الفيصل ؟ مش اننا نكشف عليها ونشوف ؟ فهما ممكن عملوا كده عشان ميحصلش الكلام ده !
يافندم تقول ايه بس اذا كان لما قالوا ضربونا وكشفوا على العذرية محدش صدقهم يبقى لو كانوا كذبوا وقالوا اغتصبونا كان حصل ايه !؟ وايه اللى يخلي الأمور توصل لكده اصلا ؟ ليه القبض عليهم ؟ دول كانوا معتصمين سلميا ؟ ليه البهدلة دى كلها ؟ ومال سيادة اللوا اذا كانوا عذراوات ولا مش عذراوات ، احنا هنعمل محاكم تفتيش عذرية ولا ايه ؟! وبعدين بصراحة المشكلة انكم مش متعودين على التعامل مع مدنيين ، يعنى حضرتك كشرطة عسكرية متعود تتعامل مع مجندين وأكيد التعامل معاهم يختلف كتير جدا عن التعامل مع مدنيين وبالذات لو بنات !
لا لا طب هقولك ... يا .... فاكر اتعمل فينا ايه فى ميدان التحرير ؟ يالهوى ! أنا اتولعت العربية بتاعتى وأنا واقف فوقيها !احنا كنا أول ناس دخلنا التحرير بعربية -ذكراسم موديل لم أتبينه- زى دى ! كنت أنا لوحدى اللى فوق ومقعد العساكر تحت وقافل عليهم عشان عارف ان هيحصل احتكاكات ! الناس سلمت علينا ! وفجأة قالوا لك دول جايين ينقلوا ذخيرة للأمن المركزى وعنها بقى والضرب اشتغل طوب ماشى مولوتوف ماشى ! عملنا ايه ولا ردينا عليهم بحاجة ! عشان دول أهلنا !
أيوه بس اتقال فعلا ان العربيات كانت بتنقل ذخيرة ، وعربيات حرس جمهورى عند مجلس الشعب برضه
لا أقولك دى كانت راحه عشان تأمن وزارة الداخلية ، وبعدين ذخيرة ايه ؟ ما لو كنا عايزين نضرب كنا ضربنا احنا ! وبعدين أقولك بقى حسنى مبارك قال للمشير اضربوا والمشير قاله لأ !
صحيح الكلام ان فيه رفض للمشيرجوه الجيش خاصة الظباط الصغيرين والكلام ده ؟
مفيش الكلام ده خالص ، أكلمك بصراحة ؟ أنا مبارك كان أبويا ! أيوه القائد بتاعى يبقى أبويا ! طلع فاسد ؟ مع السلامة !
دلوقتى القائد بتاعى هو طنطاوى .. يبقى أبويا ! بعدين الراجل مش عايز سلطة ، ده عايز البلد تقوم ، لأن فيه ناس مش عايزة البلد تقوم على رجليها
ناس مضحوك عليها ؟ ولا ناس مدفوع لها ؟!
لأ مش قصة مضحوك عليها ، دى ناس مدفوع لها ! ومخططات من زمان مش من دلوقتى بس ! أما اللى مضحوك عليهم دول زى الظباط اللى نزلوا التحرير كده أهم دول اللى بجد مضحوك عليهم ! مضحوك عليهم ومن ناس اتفصلت من الخدمة لأسباب أخلاقية ! مش هينفع أقولك أكتر من كده بس هيجى وقت وتعرف الكلام ده !
طيب أنا سعيد بالحوار ده لأن حضراتكم واضح شخصيات محترمة جدا وعندها قابلية للنقاش ، لأن فكرتنا عن الشرطة العسكرية سيئة جدا
الله يكرمك !
لا بجد دى مجاتش من فراغ ، يعنى لما دخلوا حرم الجامعة لأول مرة عشان يفضوا اعتصام طلبة الاعلام وقعدوا يزقوهم والبنات تصرّخ كلنا أما شفنا الفيديوهات قلنا ليه كده ؟!
لا يبقى انت مكنتش متابع الموضوع كويس ، الطلبه دول حاصروا الأساتذه بتوعهم واتبلطجوا عليهم ، والبلد دلوقتى فى وضع خاص مفيش حاجة اسمها حرم ومش حرم الكلام ده فى الاوقات العادية البلد كلها دلوقتى منطقة عسكرية ولو حد عمل شغب واجب نتدخل ونوقفه!
طيب ليه الحزم ده مشفنهوش فى حوادث تانية زى موقعة الجمل ولا امبابة ؟!!
انت تضمنلى انى لما اضرب رصاص مصيبش مدنيين ؟!
يافندم رصاص فى الهوا يهوش ويفرق ، وبعدين ما هو حصل اكتر من كده زى السفارة الاسرائيلية اللى اتضرب على الناس رصاص بالعبيط !
لا بس موضوع السفارة الاسرائيلية دول جم هنايومين باشوات وبعدين روحوا ولا كأن حاجة حصلت ، احنا بس ضحكنا على اسرائيل وبلفناها بالشويتين دول عشان المعاهدة وكده وعشان ميتكلموش والناس خرجت ومحصلهاش حاجة
فيه واحد حضرتك جت رصاصة فى دماغه ولغاية دلوقتى فى العناية المركزة !
فين ده !؟
من المصابين عند السفارة الاسرائيلية !
لابص فيه ناس بتضرب رصاص مش تبع الجيش ! فى التحرير نفسه فيه ناس ضربت رصاص عشان تلبس فى الجيش ويقولوا احنا !
والناس دى اتمسكت ولا متمسكتش ؟!
فيه ناس اتمسكوا وفيه ناس متمسكوش ، ومش لازم كل حاجة نعلنها ! وبعدين افرض لو كام رصاصة حى اتعمرت بالغلط ؟ يبقى معنى كده ان الجيش قاصد يموت الناس !؟
يافندم ماهى دى المشكلة ، الشعب بيحب الجيش ويحترمه ونفسه الجيش يبادله الحب والاحترام ده ! يعنى تحقيق عادى جدا زى ما بيحصل فى أى مكان واللى غلط يتعاقب !
مينفعش نعلن حاجة ! عشان ميحصلش زى الشرطة كده اللى بقوا خايفين يشوفوا شغلهم !
هو الشغل ميتشافش الا على حساب كرامة الناس ؟ واضح يا فندم اننا مختلفين جذريا فى حاجات كتير بس أنا فعلا انبسطت بالحوار معاكم ، متشكرجدا
وسلمت عليهم ، ومشيت ، وقفلت الكاميرا !
ايه رأيكم فى الكلام ؟!
لمحة من المناظرة : )
ليست هناك تعليقات:
إرسال تعليق