الأربعاء، 29 يونيو، 2011

شهادتى على انتقام الداخلية و بداية عدوانهم على التحرير



الساعة 10 تقريبا قريت تويتات متتباعة ل@loainagati  ان عيال ضايعة - تقريبا 150 واحد - مسكوا طوب وقالوا رايحين على الداخلية ننتقم لأهالى الشهدا اللى ماتوا ! أنا كنت فى البيت وقتها وبيتى فى شارع خيرت من ميدان لاظوغلى يعنى يبعد أمتار قليلة عن وزارة الداخلية ، استنيت لما لؤى قال انهم تحركوا فعليا وقررت أنزل لأنى أدركت ساعتها ان الأمور هتوصل لمصيبة !


الساعة 10:25 عديت قدام البوابة الرئيسية لوزارة الداخلية - الشارع اللى بيبقى مغلق غالبا وأقمنا قدامه مظاهرة خالد سعيد- دخلت الشارع ومحدش اعترضنى ، كان الطوب مالى الأرض لكن مفيش اشتباكات ولا متظاهرين و المكان مليان رجال شرطة بزى مدنى  ومعاهم أهالى من عابدين اللى دايما يقفوا فى صف الداخلية ضد " بتوع التحرير " على اعتبار ان بتوع التحرير مخربين ولو انتصروا على الداخلية هيجوا يخربوا مساكنهم ومحلاتهم ! والشواهد السابقة فى كده كتير من أيام الثورة ومظاهرة أمن الدولة بلاظوغلى ، كان معاهم أسلحة بيضا - سنج ومطاوى - لكن مكانش لسه ظهر الأمن المركزى ولا شرطة بزى رسمى ! اضطريت العب دور عبده العبيط كالعادة عشان محدش يشتبه فى وجودى وسألت فى ايه وكده قعدوا يشتموا فى العيال   الصيع اللى جم حدفوا طوب على الداخلية وحدفوا طوب على العربيات ومحدش عارف عايزين ايه واحنا مش هنخلص والكلام ده !


ملاحظة :  تويتات لؤى نجاتى أكدت ان الكلام ده حصل فعلا وان ضرب الطوب كان متبادل ، وان اتحدفق طوب على العربايت وتم تحويل مسارها !


المهم عديت ووقفت قدام شوية ، ومفيش دقيقة وعلى الساعة 10:32 تقريبا شفت 6 عربيات نقل جنود ومدرعة جايين ودخلوا وبدأ نزول الجنود منها وانتشارهم  قدام الوزاره وصه والكلام ده ! وبعدها الساعة 10:35 ظهر جنبى @jan25mina و @mohabelgawady والوضع كن عادى جدا وفضلنا واقفين لأنهم كانوا قلقانين على @loainagati وبيقولوا انه لسه جوه ولازم ندخل نجيبه ! وانى لازم استغل العنوان فى بطاقتى واخليهم يعدونى عشان اشوفه ! فهمتهم ان لؤى لسه بيتوت حالا ورجع التحرير وانى عديت من قدام الوزارة مكنش فيه حد !


جيه ظباط أمن مركزى واتكلموا معانا عادى وبيقولوا حانا جايين عشان نأمن الوزارة  حتى واحد منعرفوش شد معاهم عشان قطع  الطريق ورائد اعتذر له وقاله خلى كلامك معايا احنا لسه جايين منعرفش حاجة !


وشوية وتراجعوا فجأة وعمروا البنادق وصه اشتغلت فعرفنا اللى هيحصل وقررنا نرجع الميدان ، الساعة وقتها كانت 10:45 يعنى بعد 20 دقيقة على الأقل من اختفاء المجموعة اللى هاجمت الوزارة وبعد حوالى 15 دقيقة  من وصول قوات الأمن المركزى اللى مشهدوش أى اشتباكات !


وفعلا ابتدوا يجروا واقتحموا الميدان من شارع محمد محمود - عند الجامعة الأمريكية وهاريز - واشتبكوا بعنف وبدون تمييز مع كل من  ساقه حظه انه يكون موجود فى الميدان وقتها وان كانوا استهدفوا الصينية بالأساس ! الأمر كان واضح تماما بدون لبس ! مجموعة مصريين اعتدوا على مبنى وزارة الداخلية ومشيوا ! فقررت قوات الداخلية اللى جت مش انها تأمن الوزارة لأ انها تعتدى على أقرب مجموعة مصريين ليها ! انتقام وسلوك عصابى بامتياز !


لما فوجئوا بالمقاومة اضطروا يتراجعوا عشان يمطرونا بالغاز ! ودى المفاجأة التانية اللى تظهر ان الوزارة كانت بتجهز للانتقام ! قنابل الغاز العادية للى بنرميها عليهم تانى استخدمت لكن مكانتش هيا الأساس ! قنابل تانية أشبه بالقذائف - مرفق صورة - وبتطلق غاز كثيف جدا ومدى اطلاقها بعيد وبتسقط فى وسطنا مباشرة وبتسبب فى اصابة بالغة اللى بتصطدم بجسده مباشرة ! ده غير ان الغاز نفسه نوعه أقوى مش بس بيعمل اختناق لكن حرفيا بتفقد السيطرة على كل سوائل فتحات وشك ! يعنى مش بس الدموع ده اللعاب بيتساقط منك بدون أى تحكم وحرقة شديدة جدا فى العين لا توصف 






ده غير حدف الطوب علينا اللى يثبت انهم بيتعاملوا بمنطق العصابات مش رجال الشرطة اللى جايين يحموا ويأمنوا


شاهد فيديو لصدمة الناس من هجوم الداخلية المفاجىء عليهم  ووصفهم للداخلية بالبلطجية ! ، قمت باضعاف الصورة عشان متظهرش وجوه حد بوضوح ، واضح اننا رجعنا لعهد العادلى !




وبعد كده استمر الكر والفر طول الليل ولغاية الساعة 12 الضهر لما روحت ومعرفش ايه اللى حصل بعدها ! ومنساش أبدا الافراط المذهل فى رمى قنابل الغاز لدرجة قنبلة لكل متظاهر ! لكت ده مخوفناش قبل كده ولاهيخوفنا تانى أبدا ان شاء الله !


وفخور بانى اترقيت من قلة مندسة لأجندة لفئوية لبلطجى فى 5 شهور بس !




معركة محمد محمود قبل قليل - تصوير من جبهة الداخلية وأهالى عابدين

التصوير من جبهة الأهالى وظاهره فيه وجهة نظرهم انهم مقتنيعن انهم بيدافعوا عن بيوتهم !!!


الأسلحة المستخدمة من الداخلية

قنابل الغاز الأمريكانى المعتادة


القنابل الفشيخة المدمرة


فارغ رصاص


بدون تعليق 



بالفيديو : شهادتى على بداية الأحداث وعدوان الداخلية


الثلاثاء، 28 يونيو، 2011

مشاهد مؤثرة .. تغطية بالفيديو للجنازة الشعبية للشهيد محمود قطب

فيه ناس كانت منتظرة حضور الجثمان من الساعة 2 أمام مسجد عمر مكرم لكن الكلاب كانوا رافضين خروجه الا بعد توقيع أهله على تنازل ! ومندوب رئاسة الوزراء فى الجنازة كان بيكدب ويقول ان النيابة كانت عايزة التشريح وأهله رفضوا وده اللى عطل الموضوع ! لكن مالك عادلى واجهه بأن الأمر لا يحتاج الا لكشف ظاهرى ولا داعى للتشريح ! المهم أن الجثمان لم يخرج الا بعد ضغط النشطاء ، وتحركت الجنازة من شارع القصر العينى وسط الهتافات المؤثرة وضمت عدد كبير من المواطنين خلفها ، وصلينا الجنازة فى التحرير ودعينا ، وبعدين تحرك الجثمان للدفن

دى أهم مشاهد الجنازة


القصاص القصاص .. ضربوا اخواتنا بالرصاص

الشعب يريد ..اعدام الكلب حبيب

يا شهيد هناخد تارك .. لما نعدم حسنى مبارك


ده أكتر مشهد أثر فيا فى اليوم .. بنت كانت بتردد هتاف " الشعب يريد اعدام الكلب حبيب " بقوة  لدرجة الانهيار .. أعتذر انى مقدرتش أصورها لأنى مقدرتش أبص لها .. لكن صورت صوتها ورد فعلنا



الدعاء بعد الجنازة .. وتأكيد على النزول يوم 8 يوليو


أقارب محمود قطب


الصور








خيالك طايف معايا

روحك تحلق في سمايا

انت دم فوق الراية


ريح الحرية منســيـــــة

انت نار انت جمرة 

تسقي شعلة الثــــــــورة

 
بعثوك للموت وكذبو عليك وعلينا

عمري ماننسى مين انت 

انت جرح الأمة اللى ما يبراش 

انت صوت النكبة اللى متوفاش 

انت عين الموت اللى متتنسى 

عمرى ما ننسى مين انت



الاثنين، 27 يونيو، 2011

بالفيديو : سلفيون يحطمون سينما فى تونس وشيخ سلفى يهدد الحكومة ان لم تفرج عنهم !!

استيقظت اليوم على خبر مقلق على الفيسبوك تداوله الأصدقاء التوانسة عن قيام عناصر سلفية تنتمى الى مايسمى ب( حزب التحرير الاسلامى ) المحظور قانونا ، باقتحام دار سينما أفريك آرت فى العاصمة تونس مساء أمس الأحد أثناء احتفالية ثقافية عن حرية التعبير كان مقررا أن تعرض فيلم " لا ربى لاسيدى " كما يتداول اسمه المثقفون أو " لا الله لا شىء " كما يتداول اسمه الاسلامويون ! للمخرجة التونسية المثيرة للجدل ناديه الفانى ! والتى أنشأت عدة صفحات على الفيسبوك لمهاجمتها ومهاجمة الفيلم مثل هذه الصفحة   


حيث يطالبون بمنع عرض الفيلم باعتباره يستهزىء بالذات الالهية  وينكرها - كما يبدو من عنوانه -!! واستشهدوا لتصريح لمخرجته أنها لاتؤمن بالاله وتتمسك بحرية الرأى والتعبير !


 تلك العناصر احتشدت أمام سينما أفريكار رافعة راية سوداء مكتوب عليها لا اله الا الله - الراية المميزة لحزب التحرير فى تونس - وراية أخرى مكتوب عليها " الشعب يريد اسقاط الالحاد " وأخرى منددة بالفيلم ومخرجته  !ورددوا الهتافات المنددة بالعلمانية وبالفيلم !


ثم اقتحموا القاعة لما زاد عددهم وأثاروا الفوضى وقاموا بتحطيم المقاعد وتعنيف الحضور والاعتداء على المنظمين ومنهم الحبيب الهادى مدير القاعة - الذى نقل للمستشفى وفقا لرواية المدونة فاطمة الرياحى - والمناضل الحقوقى الصادق بن مهنى والد المدونة لينا بن مهنى ،  وقد حضر الأمن متأخرا - كالعادة فى الحوادث الشبيهة- وقام  باخراج الشباب المعتدى واعتقال بعضهم


المفارقة أن مقر وزارة الداخلية فى تونس يقع بالقرب من دار السينما والتى تقع فى أهم شوارع العاصمة تونس "شارع الحبيب بورقيبة"


ووفقا لشهود العيان فان الوجوه التى قامت بالاعتداء هى نفسها التى اعتدت على المشاركين فى مسيرة تأكيد علمانية تونس والتنديد بمقتل القس البولندى قبل شهور " تونس ليك .. تونس ليا .. تونس لائكية " وكذلك حوادث الاعتداء على الحانات فى العاصمة ومسيرات المطالبة باغلاق بيوت البغاء العلنية  والتى استجابت لها الحكومة !

كما  أن الفيلم كما يروى من شاهدوه يناقش عن حرية التعبير فى تونس بعد الثورة ،  ولا يهاجم الذات الالهية كما هاجمه من لم يشاهده وطالبوا بمنع عرضه ! والمفارقة الأكبر أن عنوان الفعالية التى كان يعرض الفيلم كجزء منها هو " نحي يدك علي مبدعينا "! وكان يفترض أن تشهد القاء شعر وعرض اسكتشات تمثيلية وأفلام أخرى ولم تكن قاصرة على الفيلم محل الجدل !

شاهد فيديو تقرير الجزيرة وتصويرها للقاعة بعد الاعتداءات


شاهد فيديو لجانب من الهتافات بعد اخراج الأمن للمعتدين من القاعة


المقلق هو ما حدث منذ دقائق ، بنشر فيديو لشيخ سلفى تونسى يكنى نفسه  "بأبى أيوب " يتوعد فيها الحكومة ان لم تفرج عن الشباب الذى تم اعتقاله ، وهذا نص ماقاله والفيديو موجود بالأسفل ! :

"فنقول لكم ، اليوم لما نزل أهل تونس أمام تلك القاعة ليمنعوا أو ليعبروا عن رفض هذا الفيلم ، قمتم باعتقال 5 أو 6 من شباب تونس ـ نقول لكم وبالله التوفيق ! ، أنتم بها تعلنون الحرب على الاسلام ، وتجاهرون بهذه الحرب ! ، كنتم تقولون أن هذا الشباب الذى وضعتموه فى السجن متشدد ونحن ديننا دين اعتدال ، هل الاعتدال انكار وجود الرب والكفر به والاشراك به ودعوة الناس الى هذا ، ان كان هذا الاعتدال فى قاموسكم فنحن نلقى بهذا القاموس الى أعماق المحيطات ! حتى لا يقرأه  أبنائنا ! وان كان الاعتدال فى قاموسكم اعادة فرق الارجاء كما قال وزير الشئون الدينية وزيركم ، هذا الاعتدال أيضا نحن نرمى به عرض الحائط ! أقول لكم عليكم أن تفرجوا عن اخواننا الذين عبروا عن رأيهم وهو فى قانونكم مباح حتى لا تكون فتنة ويكون الدين كله لله ، وحتى لا تتسارع الأحداث الى ما لا تحمد عقباه ! فان الناس لا يرضون بها ، حتى أنت يا أيها الوزير الأول ان كنت ترضى بالكفر والالحاد فان شعب تونس لايرضى بك ولا بالكفر والالحاد ! الله الله فى أهل تونس الذين اعتقلتموهم ! أطلقوا سراحهم والا فما نعتقد أن الأمور ستسير الى ما يحمد عقباه !أقول ما تسمعون ! والله ولى التوفيق ! وصلى الله على نبينا محمد وعلى آله وصحبه أجمعين !"




وها هو قد تجمع 50 شابا من الجماعة أمام قاعة المحكمة الابتدائية بتونس منذ قليل ورددوا الهتافات واشتبكوا مع أحد القضاة !

ولا أدرى هل الحكومة التونسية عاجزة حقا عن فرض سيطرتها على هؤلاء أم أنها لعبة ارخاء الحبل المعتادة ؟! أظن أن الاجابة الأقرب هى الثانية ! وحفظك الله يا تونس الحبيبة وخالص تضامنّا ..

تغطية الصحافة التونسية للحادث :  1  2  3

تحديث : نفذ المتشددون تهديدهم واشتبكوا اليوم مع بعض المحامين أمام دار المحامى ( النقابة ) ومنهم عبد الناصر العوينى صاحب صرخة بن على هرب الشهيرة 


فيديو للاحتجاج الذى تطور لاشتباك


تغطية خبرية للحادث


قائمة باعتداءات المتشددين خلال الأربعة أيام الأخيرة


هل تحولت أراضى المشروع القومى للاسكان المميز !؟

هذا الاعلان جاء بأهرام الجمعة 24 يونيو ، على الصفحة رقم 28 




شركة دجلة تعلن عن وحدات مميزة ! داخل مشروع دجلة بالمز الذى هو جزء من المشروع القومى للاسكان بحدائق أكتوبر ! ومن المفترض أن مساحته قياسية ( 63 مترا )  وتحصل الشركات على الأراضى بنظام التخصيص وبسعر مدعوم لتنفيذ المشروع الذى سمى بالقومى لاسكان الشباب محدود الدخل !  بينما سعر أى وحدة يصل ل 150 الف جنيه !! 


المهم السؤال هل حصلت شركة دجلة للاستثمار على الأراضى التى أقامت عليها الوحدات المميزة ( مساحة أكبر - تصميم أفضل - سعر أعلى ) بسعر تنافسى وبمزايدة علنية ؟! أم تم تخصيصها بالأمر المباشر وبنفس السعر المدعوم أو أعلى قليلا داخل الأراضى المخصصة للشركة فيما سمى بالمشروع القومى للاسكان ؟!


كما يحق لنا التساؤل أيضا : هل سيتم مراجعة أسعار هذا المشروع وفقا لتكلفته الفعلية وهامش ربح معقول أم يبقى الحال على ما هو عليه ؟!


بانتظار اجابة الدكتور شرف ووزير الاسكان والشركة تحقيقا لمبدأ الشفافية !

بالفيديو : يحيى الجمل لم يتحدث عن تأجيل الانتخابات و لكن الفترة الانتقالية !



اللبس الذى حدث مساء أمس بدءا من خبر تصريح الجمل أن المجلس العسكرى اقتنع بتأجيل الانتخابات البرلمانية الى ديسمبر والذى تناقلته المواقع عن موقع اتحاد الاذاعة والتلفزيون ، ثم تراجع الموقع وتعديل الخبر  ثم   تكذيب مسئول عسكرى لهذا الكلام


حقيقة الأمر هو لبس فى فهم تصريحات الجمل ، فهو كان يتحدث بالفعل عن الفترة الانتقالية الستة أشهر بدءا من  الاعلان الدستورى فى مارس وحتى سبتمبر موعد تسليم السلطة لحكومة منتخبة ، وأنه أقنعهم بمد الفترة الانتقالية حتى نهاية ديسمبر بانتهاء الانتخابات الرئاسية واعلان نتائجها ، ولم يذكر مطلقا تأجيل الانتخابات البرلمانية من سبتمبر الى ديسمبر كما فهم محرر الخبر على موقع اتحاد الاذاعة والتلفزيون بالخطأ ، فلوكانت الانتخابات البرلمانية فى ديسمبر فمتى  تكون الانتخابات الرئاسية وكيف  يستقيم وقوله لن يستمروا يوما واحدا بعد 31 ديسمبر ؟!


"أنا هقول على حاجة وهقولها وأمرى الى الله ويعملوا اللى يعملوه ، المجلس الأعلى للقوات المسلحة كانوا مصممين على سبتمبر ، وأنا أحد الناس اللى دخل معاهم فى حوارات ، وأقدر أقول الحمد لله بتمتع بقدر كبير من الثقة ، وبشق النفس أقنعتهم انه ينتقل من سبتمبر لديسمبر ، لكن فكرة انه بعد ديسمبر بيوم واحد هم رفضوا"




يارب الموضوع ينتهى عند كده وميبقاش قضية اليوم وننسى كل حاجة تانية !


انظر : أشمل مطالب توافقية ليوم 8 يوليو ، جاهزة للطباعة والنشر

الأحد، 26 يونيو، 2011

أشمل مطالب توافقية ليوم 8 يوليو ..للطبع والتوزيع




الجمعة 8 يوليو نازلين ومعتصمين  : مصرأولا.. الثورة أولا

1- اعادة بناء جهازالشرطة وتطهيره من المجرمين والفاسدين  ،  ومعاقبة المتورطين  فى 28 يونيو ، وتجريم أى مساس بالتظاهر السلمى ، وتعيين ناشطا حقوقيا وزيرا للدولة مختصا بنظر الاصلاحات فى الداخلية  .

2-الاسراع فى محاكمة  قتلة الثوار والفاسدين خلال محاكمات علنية، ومحاكمة رموز النظام وعلى رأسهم المخلوع بتهمة الافساد السياسى،و الاسراع فى الاجراءات لاسترداد الثروات المنهوبة فى الداخل والخارج.

3-فرض الحد الأدنى للأجور على القطاعين العام والخاص وربطه بالحد الأقصى وشموله العمالة المؤقتة  ، وتكريم ورعاية الشهداء والمصابين وأسرهم ، والاسراع بصرف تعويضات مضارى الثورة .

4- تعديل أولويات الاقتصاد ليصبح تحسين معيشة المواطن قبل زيادة أرباح المستثمرين ، باعادة هيكلة  دعم الطاقة وفرض الضرائب التصاعدية  ، وضغط الانفاق الأمنى ، وبدء خطط النهوض بقطاعى الصحة والتعليم ، وتغيير السياسة الزراعية ووضع الأولوية للسلع الاستراتيجية لتحقيق الاكتفاء الذاتى منها ، واصلاح قطاع النقل وخفض  تكلفة المواصلات ونقل السلع بخفض أسعار السولار على حساب البنزين عالى الجودة .

5- الوقف الفورى لاحالة المدنيين للقضاء العسكرى ، واعادة محاكمة كل المحكوم عليهم بأحكام عسكرية أمام القضاء الطبيعى ، وفتح التحقيق أمام القضاء الطبيعى عن أحداث فض اعتصامات 9 مارس و9 ابريل والسفارة الاسرائيلية 15 مايو ، واعلان النتائج بشفافية ومحاسبة المخطئين  ، ونظر العفو عن ضباط 8 ابريل .

6- بحث استرداد المصانع المغلقة واعادة تشغيلها ، والمصانع المنهوبة مثل الدخيلة ، وانشاء الدولة لمصانع جديدة لتوفير فرص عمل للشباب ، وتمويل ذلك من خلال الصناديق الخاصة و فرض الضرائب التصاعدية.

7- تطهير النيابة العامة والقضاء ، وضمان الاستقلال عن السلطة التنفيذية ،ووقف تعيين ضباط الشرطة فى النيابة العامة  ، وتفعيل رقابة النيابة على الشرطة ،وتطهير أجهزة الرقابة والمحاسبة وتوحيدها فى جهاز مركزى.

8- البدء فى تنفيذ  مشروع لاسكان الشباب منخفض التكلفة لا الجودة، والاسراع فى توفير مسكن لائق لسكان الخيم والعشوائيات والمقابر ، وتشكيل لجان لاعادة حصر التوزيعات السابقة التى شابها الفساد .

9- اعادة حركتى المحافظين والمحليات اللتين تمتا بنفس أسلوب النظام السابق ، واستبدال جميع الوزراء الفاشلين بآخرين على قدر المسئولية ، واقالة الفاسدين من كل المؤسسات والهيئات الحكومية وتطهيرها .

10- تفعيل الرقابة على الأسواق لضبط الأسعار ، ودخول الدولة كموزع للسلع لضمان تخفيض أسعارها ، وحل مشكلات الفلاحين والصيادين مع البنوك والجمعيات الزراعية وتوفير احتياجاتهم ، وضبط سوق الانتاج الحيوانى باعادة مشروع البتلو والتكامل مع السودان ، وحل مشاكل قطاعي الدواجن والأسماك .

11-   تفعيل الحوار والتوافق المجتمعى حول القوانين والقرارات ، والمبادىء فوق الدستورية التى ستشكل أساس الدستور الجديد ، والغاء القوانين التى صدرت دون حوار مجتمعى مثل قانون الاعتصام .

12- تطهير الاعلام المصرى تطهيرا شاملا  ووقف حملات التشكيك والتحريض ، وضمان الاستقلال له حتى يكون معبرا عن مصالح الوطن وليس أى سلطة حاكمة .

الثورة مستمرة .. نختلف نتحاور نتوافق .. لكن لا نترك الميدان

المطالب دى تم اعادة صياغتها مرات عديدة ، ونشرتها على المدونة والبديل نشرتها ووصلنى فيدباك كتير وأعدت صياغتها  ، أرسلتها لصفحة يوم الغضب الثانية و أخذوا ببعضها وعدلوا مطالب الصفحة ، وحركة 6 ابريل أيضا وده شىء جيد جدا لكن ليس جميعها وأنا شايف ان كلها مهمة ، معظم الأفكار مستلهمة من نقاشات تويتر فهى مطالبنا جميعا ، للنشر والتوزيع للدعاية لليوم ، والباب مفتوح لمزيد من الملاحظات 

السبت، 25 يونيو، 2011

طرائف حركة المحليات : انقل صاحبك لو هما كتير !!

قريت النهارده استفسار التويبس @5orm  و @MiralBrinjy  على تويتر اذا كان فتح الله رئيس مدينة رشيد اللى خلعوه هو رئيس حى العجوزة دلوقتى ؟! ولأنى سبق وكتبت تدوينة رصدت فيها خلفيات حركة المحليات بالكامل لكن لم تحظى بانتشار كافى ، قررت أكتب تدوينة عن أهم الطرائف فى حركة المحليات !


اللواء فتح الله الجندى اللى اتعين رئيس لحى العجوزة .. كان رئيس لمدينة رشيد ولما الأهالى ثاروا ضده اضطر المحافظ يديله شلوت لفوق وعينه سكرتير مساعد لمحافظ البحيرة ! لكن لما استمر الغضب الشعبى ولأنه راجل بركة تم نقله للقاهرة رئيسا لحى العجوزة !


اللواء عبد الناصر الدمياطى ، اتعين سكرتير مساعد لمحافظة المنيا .. كان رئيس لمدينة دسوق وثار ضده الأهالى وتظاهروا لاقالته واتهموه بالفساد ، وبالفعل أقاله المحافظ ، ولكن لأنه راجل بركة اتعين سكرتير مساعد للمنيا بعدها بأقل من شهر !

المحاسب أحمد حشمت عز الدين رجل الشاذلى الوفى رسب فى انتخابات الشورى 2010 ، فتم تعيينه سكرتير عام لمحافظة دمياط ! وبعد تحقيقات معاه من الأجهزة الرقابية  بتهم فساد استقال - أو استقيل - ،  لينتقل فجأة بعدها بشهر سكرتير عام لمحافظة المنيا !!!!!!!!!!!!

اللواء السعيد عبد المعطى ، اتعين سكرتير مساعد لمحافظة بنى سويف ، كان رئيس لحى غرب المنصورة وكان فيه مظاهرات ضده للمطالبة باقالته ، وبالفعل تم ابعاده بشلوت لفوق ، والصعيد بعيد ومين هيدور !

السيدة زينب حسانين رئيسة مجلس مدينة أجا  ، ومدينة ميت غمر من قبل ، والتى أثيرت حولها دعاوى فساد ابان توليها هذه المناصب ، لكن نشاطها فى الحزب الوطنى  وفر لها الحماية ، لكن كيف بعد الثورة تقفز لمنصب سكرتير عام مساعد لمحافظة الوادى الجديد !!!؟؟؟

اللواء أ ح حسام الدين طاهر مرشح الحزب الوطنى فى انتخابات مجلس الشعب 2010 والذى رسب فيها ! تم تعيينه بعدها سكرتير عام مساعد لمحافة المنوفية ترضية له ! وجاءت حركت المحليات بعد الثورة لتبقيه فى المنصب !


دى أهم الطرائف لكن للاطلاع على تفاصيل الحركة كاملة وأعضاء الوطنى البارزين فيها ولواءات الداخلية والجيش افعص هنا


وشوفوا كمان التدوينة الشهيرة عن حركة المحافظين وخلفياتهم المهنية واللى كشفت لأول مرة عن المحافظين القادمين من أمن الدولة حماد وحفظى  وعن قدوم عماد ميخائيل من مديرية أمن الجيزة !


وثورة ثورة !!!

تغطية بالفيديو ليوم "ثورة غضب أبناء مبارك " !

دى أفضل الفيديوهات الموجودة على اليوتيوب حتى الآن لتغطية أحداث اليوم ، مصورتش أيا منها بنفسى ومرحتش هاك أصلا ، مش مخبول عشان أسيب وقفة أهالى السلام والدويقة وأهالى ماسبيرو وأروح أقف مع أولاد المخلوع
   

1-  هتافات المظاهرة الصبح



2- لقاءات مع أولاد مبارك 









3- قطع الطريق أمام السيارات



4- اشتباكات مع المواطنين بعد قطع الطريق 


وسبحان القائل : " ويخلق ما لا تعلمون " !


وبالمناسبة السعيدة دى أحب أهدى لولاد مبارك أغنية : سجن طرة

"ويا جمال وصّل لأبوك ، المصريين هيحاكموك ، وهيدوك بدال الكرسى ، زنزانة ومن غير شباك ! ، حسنى انت وجمال ،  وكمان علاء ، ما الحرامية مكانها هناك !" 


الجمعة، 24 يونيو، 2011

فقراء الدويقة .. ضحية جديدة لجبروت الشرطة المستمر

تحديث : معلومات يتناقلها الأهالى عن قدوم القوات لاخلائهم صباح الأحد 25 يونيو

اقتحمت فجر الأربعاء الماضى قوة من الشرطة من قسم منشية ناصر وقوات شرطة خاصة ملثمة   المساكن التى شغلها بعض أهالى الدويقة بعد ثورة يناير بعد أن كانت شاغرة    و الذين كانوا يقيمون فى خيم منذ أكثر من عام بعد ازالة مساكنهم لخطورتها وعلى وعد بالحصول على مساكن بديلة ، قامت الشرطة باقتحام المنازل من البلكونات الى غرف النوم  واعتقال الرجال بملابسهم الداخلية واهانتهم واهانة زوجاتهم وافزاع الأطفال وبعثرة محتويات الشقق ، وحولتهم للنيابة العسكرية بتهمة الاعتداء على أملاك الدولة وأضافت لبعضهم تهمة حرز سلاح نارى أو أبيض ، وللبعض الآخر تهمة مقاومة السلطات ،والذى ينفيه ذووهم تماما ويشيرون لأن الشرطة كانت تصور كل ماحدث فأين الصور التى التقطت للسلاح داخل المنازل ؟!

جدير بالذكر أنه سبق وحضرت قوة الجيش والداخلية لاخلائهم يوم 25 مايو ولكنهم احتشدوا ورفضوا الخروج من المساكن وهتفوا " يا تسكنونا يا تموتونا " ، مما دفع القوات للانسحاب وطمئنتهم ، لكن رجال مباحث القسم توعدوهم وقاموا بتصوير من تزعموا التظاهرات وهم الذين تم اعتقالهم من منازلهم !

سيتم عرضهم على النيابة العسكرية اليوم صباح الجمعة فى العاشرة صباحا ، وسيتواجد ذووهم وكل المتضررين والمقيمين فى الشارع منذ أكثر من عام أمام ماسبيرو اليوم فى الواحدة ظهرا ، فلنتضامن معهم ، فالقضية لا تحظى بأى تغطية اعلامية أو متابعة حقوقية -باستثناء مجموعة لا للمحاكمات العسكرية التى عرفت بالقضية من خلالهم -


وشاهد بنفسك المأساة

زوجات المعتقلين يروون مأساتهم 





وهذه هى الخيم والعشش وحال من لازال مقيما فيها ، ان كنت تتسائل أين كانوا يقيمون قبل استيلائهم على الشقق





مدخل المساكن 




المواسير التى تسلقت عليها الشرطة 



آثار الاقتحام على الأبواب





بعثرة محتويات الشقق











العريس الذى تم اعتقاله 





الذين بقوا فى العشش





فاذا كان هذا لايزال حال الفقراء وهكذا لازالت تتم معاملتهم ، فعن أى ثورة نتحدث اذن ؟!


الأربعاء، 22 يونيو، 2011

مطالب 8 يوليو ، جمعة استكمال الثورة والضغط لتحقيق المطالب التوافقية , الفقراء أولا


نازلين نكمل ثورتنا ، ونضغط لتحقيق المطالب التوافقية وأولويات الثورة، مش نازلين نفرض مطلب معين أو  رؤية تيار سياسى معين ، وعشان منشتش نفسنا دى المطالب اللى توافقنا عليها قبل كده ، حولت صياغتها حسب الأولوية، ومفتوحة للاضافة والتعديل ، دى ثورتكم ودى خطوة للحوار والتوافق مش أجندة مسبقة


1- احداث تحسين وتغيير فورى فى مستوى معيشة الفقراء وقود الثورة وأكثر من تحمل عبئها ، بفرض الحد الأدنى للأجور على القطاعين العام والخاص والعمال المؤقتة فى أسرع وقت ، وصرف اعانات البطالة ، والاسراع بصرف تعويضات مضارى الثورة ، وتكريم أسماء الشهداء وأسرهم ،ورعاية مصابى الثورة وتكريم أسرهم


2- اعادة هيكلة سياسة دعم الطاقة فورا وسحب دعم المصانع أو تقليله التدريجى وتوجيهه لدعم السولار ، ودعم أنابيب البوتجاز وتوفيرها بسعرها الطبيعى ، ووقف تصدير الغاز للخارج نهائيا وتوفيره فى توليد الكهرباء قبل هجوم الموجة الحارة وتكرار الانقطاعات بسبب المازوت !


3- تفعيل أجهزة الرقابة على الأسعار للقضاء فورا على الزيادات غير المبررة ، ودخول الدولة كموزع للسلع لضمان تخفيض أسعارها ، وحل مشكلات الفلاحين مع البنوك والجمعيات الزراعية وتوفير احتياجاتهم ، واعادة مشروع البتلو والتكامل مع السودان فى توفير الانتاج الحيوانى بأسعار معقولة .


4-الاسترداد الفورى للمصانع المغلقة واعادة تشغيلها ، والمصانع المنهوبة التى بيعت بأبخس ثمن ، وانشاء الدولة لمصانع جديدة لتوفير فرص عمل للشباب ، وتمويل ذلك من خلال الصناديق المالية الخاصة أو فرض الضرائب التصاعدية


5- الاعلان عن مشروع لاسكان الشباب منخفض التكلفة لا الجودة، وتوفير مسكن لائق لسكان الخيم والمقابر والعشوائيات


6- تغيير السياسة الاقتصادية التى اتبعت خلال النظام السابق ، ووقف مشروعات الاقراض ، وبحث البديل من خلال هيكلة دعم الطاقة وفرض الضرائب التصاعدية  ، وضغط الانفاق الأمنى  ، الأمر الذى يمكنه توفير مليارات ، تستغل كذلك فى وضع خطط للنهوض بقطاعى الصحة والتعليم ، وتغيير السياسة الزراعية ووضع الأولوية للسلع الاستراتيجية وتبنى مشروعات قومية لتحقيق الاكتفاء الذاتى منها .



7- الاسراع فى الاجراءات لاسترداد ثروات مصر المنهوبة فى الداخل والخارج ، والاسراع بمحاكمة الفاسدين وقتلة الثوار محاكمات علنية ، ومحاكمة رموز النظام السابق بتهمة الافساد السياسى


8- الوقف الفورى لاحالة المدنيين للقضاء العسكرى ، واعادة محاكمة كل المحكوم عليهم بأحكام عسكرية أمام القضاء الطبيعى


9- فتح التحقيق أمام القضاء الطبيعى عن أحداث فض اعتصامات 9 مارس و9 ابريل والسفارة الاسرائيلية 15 مايو ، واعلان النتائج بشفافية ومعاقبة المخطئين ، والعفو عن ضباط 9 ابريل الذين تضامنوا مع الثورة و اعتقلوا من التحرير أو منازلهم


10- التطهير الفورى للنيابة العامة والقضاء ، وضمان استقلال القضاء تماما عن السلطة التنفيذية ، ووقف تعيين ضباط الشرطة فى النيابة العامة  ، وتطهير أجهزة الرقابة والمحاسبة وتوحيدها فى جهاز مركزى واحد والقضاء على التخبط الحالى بينها


11 - تطهير الشرطة من الفاسدين وقتلة الثوار ، وتفعيل رقابة النيابة على أعمال الشرطة وجهاز الأمن الوطنى الجديد ، وقصر دوره على جمع المعلومات عن المخاطر الأمنية دون التدخل فى الحياة  العامة والتجسس على المواطنين


12- حل المحليات بؤر الفساد فورا ، وفتح الباب لانتخاب المحافظين  ، واقالة يحيى الجمل نائب رئيس الوزراء ، واقالة الفاسدين من كل المؤسسات والهيئات الحكومية وتطهيرها 


13- تفعيل الحوار والتوافق المجتمعى حول أى قوانين جديدة والغاء القوانين التى صدرت دون حوار مجتمعى حولها مثل قانون الاعتصام ، وحول ملامح ومبادىء الدستور الجديد الذى وافق الشعب فى المواد التى استفتى فيها على تفويض البرلمان المنتخب فى اختيار جمعيته التأسيسية ، وذلك قبل أن يضيف اليها المجلس العسكرى عشرات المواد الأخرى ويعدل فى بعضها


14- تطهير الاعلام المصرى تطهيرا شاملا ، وضمان الاستقلال له حتى يكون معبرا عن مصر وليس أى سلطة حاكمة


15- وقف حملات التخوين والتشكيك ، وحظر الدعاية الدينية فى السياسة


هذه مبادرة لجمع الأفكار التى يمكن أن نتوافق حولها ، لم آت بجديد وانما جمعت ما نردده يوميا ورددناه من قبل وأعدت تنظيمه ، والمبادرة مفتوحة للجميع


نسخة مختصرة وجاهزة للطباعة 


شاهد الفيديو : الفقراء يعرضون مطالبهم ..راجين التحرير ليه ؟!


الثورة مستمرة ،   استكمال الثورة خير للجميع

لو اقتنعت انشر المطالب وشارك فى صفحة المطالب على الفيسبوك

التويت ندوة -2 انطباعات وقبسات !

مبدئيا المكان كان واسع وجيد التهوية ، واختيار موفق


اختيار المتحدثين كان مناسب نظريا للتجارب للى كانوا شهود عليها ، لكن غير منطقى ان يكونوا كلهم يساريين !! أو من جيل حراك واحد ! أظن التنويع كان مطلوب زى ما حضر أحمد سمير وأروى الطويل مع مجدى سعد ومنعم  ، كنت أتمنى تنويع الاتجاهات وكذلك  أتمنى وجود الرائع جمال عيد ، وأظن أن علاء دعاه لكنه اعتذر


الدكتورة عايدة سيف هنلتمس ليها العذر فى عدم الحضور وعدم الاعتذار وعدم الرد على الاتصالات  ! فهى قامة كبيرة نحترمها ونقدرها ! لكن ننتظرمنها اعتذار على تويتر !


كان واضح المجهود المبذول فى التجهيز للندوة ، وأخص بالذكر علاء ومنال وليليان وجدى


اختيار الموضوع أكثرمن رائع وخلى البعض يتساءل ليه مكانش موضوع أول تويت ندوة ؟!


حديث المنصة فى المجمل كان جيد جدا الذكريات اللى كتير مننا - ان لم يكن معظمنا كجمهور تويتر الحالى - معلوماته عنها كانت محدودة ، ده خلى البعض يندم على انه مشاركش ! أو انه كان مقضيها النيل للأخبار والأهرام فى الفترة دى ، أو يندم على انه مكانش جامعة القاهرة ! أو يندم على انه متولدش بدرى ! الجملة الأخيرة من @abdelrhmanafify  


الحديث كان ملهم أن الثورة مش جملة اعتراضية وانما نبتة نمت بعرق وجهد  وتضحية الالاف فى السنوات الماضية ، ومستمرة رغم التقلبات


ادارة الندوة كانت مختلفة عن المرة السابقة ، علاء المرة دى كان أقل سيطرة على الحوار وعلى الوقت المخصص للمنصة ، اللى تجاوزوا كتير فى الوقت


ترتيب المتحدثين تصاعديا من حيث تجاوز الوقت : حسام ، وائل ، خلود ، أسماء .. وبالذات أسماء وخلود أحيانا أصروا على الاستطراد فى تفاصيل هامشية وعدم تكثيف الحديث دون مراعاة لطبيعة الندوة ، لدرجة الاستفزاز أحيانا - معلش يا أسماء تويترجية ولساننا طويل


مداخلات الحضور كانت مثرية جدا ، وعلاء حاول تنويع الحديث حسب مكان الجلوس والعمر والجندر ، لكن ده معناه فى الغالب ان لو اللى جنبك اتكلم انسى انك تتكلم :))


مقتطفات من التويت ندوة


سبتمبر 2000  اندلاع الانتفاضة الفلسطينية الثانية  كان خروج من حالة الجمود السياسى ونشأت حركة شعبية مفاجئة ونشطة من كل التيارات ونشطاء غير مسيسين للتضامن مع الشعب الفلسطينى بالمظاهرات والتبرعات


الحرب على العراق 2003 كانت مظاهرات قوية ضد النظام ونجح المحتجون فى احتلال التحرير لأكثر من مرة والهتاف ضد مبارك واسقاط صورته !

كل المظاهرات فى الفترة دى كانت لقضايا اقليمية، لكن الشعار كان الطريق الى القدس يمر بالقاهرة !


حركة كفاية نشأت من رحم الحركة دى لتوجه الجهد نحو الداخل ، تحت شعار لا للتمديد لا للتوريث ، حراك أثمر التعديل الدستورى والحراك الذى تلاه


حركة كفاية قامت نظمت مظاهرات عديدة ضد النظام مثل مظاهرة الاستفتاء والاعتداء على الناشطات 25 مايو 2005  ، ومظاهرة الحداد الأسبوع الذى تلاه -حضرتها وكان حدث فضائى بالنسبة لى :) - ، وما تلاه من احتجاجات ، وقامت بأفكار رائدة مثل مظاهرة كنس السيدة ! ومظاهرة التعذيب أمام قسم السيدة !


حركة شباب من أجل التغيير خرجت من رحمها لكنها كانت مخترقة أمنيا ، فتحولت الاستراتيجية للمظاهرات المفاجأة عن طريق الاتصال الشخصى المباشر بين النشطاء الموثوقين 


التضامن مع حركة القضاة بدأ فى مارس 2006  باحالة قاضيين - البسطويسى ومكى للمحاكمة -  وتبع ذلك اعتصام فى التحرير ، واللى ادى الزخم الاعلامى لحركة القضاة شهادة نهى الزينى ضد التزوير


تم اعتقال المتضامنين وطال الاعتقال من أسبوعين ل 6 شهور ، وبعد الخروج تغير الوضع الأمنى وتشدد ولم تنجح حركة كفاية فى التعامل معه فضعفت

حركة 20 مارس للطلبة وأعضاء هيئة التدريس نشأت للتضامن مع العراق وتفرع عنها طلاب من أجل التغيير  وسهل بعد كده فكرة اتحاد الطلاب الحر ، اللى واجهه الأمن بعد كده بالعنف والاعتقالات رغم ان دوره مكانش فعال 


- اليسار مكانش ليه جذور فى الطبقة العاملة لغاية سنة  2006 والتغطية الصحفية والاخبارية للاحتجاجات السياسية فى الفترة من 2000- 2006 أدت لزيادة جرأة الحركة العمالية


أول اضراب عمالى كبير 7 ديسمبر 2006 3 آلاف عاملة من قسم الغزل والنسيج فى المحلة أضربوا ونزلوا الشارع  للحصول على منحة الشهرين المتأخرة وهتفوا الرجالة فين الستات أهم ! مما أحرج الرجالة وخلاهم يضربوا !

عام 2006 شهد اضرابات فى كل القطاعات لدرجة التندر ان القطاع الوحيد اللى مأضربش كان الشرطة !


تم قمع القيادات العمالية فى غزل المحلة ، فقام الحراك البديل من موظفى الضرائب العقارية قدام مجلس الوزرا ، ونجحوا فى نيل مطالبهم ، ثم أنشأوا نقابتهم المستقلة
مما زاد زخم الحركة العمالية !
 
نجاح اضراب 6 ابريل فى المحلة ينسب لأهل المحلة وجاء عفويا من الشارع بعد اجهاض اضراب المصنع بسبب الأمن والمخابرات ! ،  ولم يكن للفيسبوك أى دوركما صور الاعلام ! ست وطفل كانوا بيهتفوا عن الغلا فى الميدان أمين شرطة ضربهم بالقلم ، فكانت شرارة انتفاضة استمرت 3 أيام وأعجزت الأمن واحتلت الشوارع وأسقطت صور مبارك ، لكن قمعت بمنتهى العنف !


العمال باضراباتهم المستمرة واعتصاماتهم ساهموا فى التمهيد للثورة


العمال شاركوا فى أسبوع الثورة الأول كمتظاهرين ومعتصمين فى الميادين لأن المصانع والهيئات كانت مغلقة ولما فتحت فى الأسبوع الثانى أضربوا فى كل القطاعات وعجلوا بسقوط المخلوع !


أسود لحظة : حسام دخول الدبابات بغداد ، أسماء أيام  المظاهرات على سلالم النقابة وكان هو ده سقفنا 


حسيتوا ايه لما الناس نزلت : حسام عيطت .. عرفت انها نهاية النظام لما العمال نزلت ، أسماء لما لقيت امبابة قامت اقتنعت ان فيه ثورة جايه ، خلود مكنتش ناوية أنزل لكنى فوجئت بمنظر الناس على كوبرى قصر النيل الساعه 1 الضهر ونزلت ومرجعتش

المناقشات 


مداخلة : الثورة كانت مستمرة ضد الحكم العسكرى من 52 وحتى الآن !


وائل : الناس اللى نزلت من 25 يناير لغاية 11 فبراير أكبرمن أى تنظيمات


نهى عاطف  : ساهم فى خروج حركة التغيير من اطارها النخبوى الضيق لدايرة شبابية أوسع فضاءات الثقافة المستقلة زى الساقية وروابط ، ودور النشر المستقلة ، ده خلانا نقرا اكتر ونشوف بعض أفضل ونتلاقى 


مداخلة : تم اهمال الخط السياسى للثورة لحساب الخط الاجتماعى ، اعتصام ماسبيرو والحد الأدنى للأجور شاهدين !


علاء الفقراء أولا كانت تشير أيضا لأن الفقراء دفعوا أكبر تمن للثورة ، وأن الشهداء الفقراء متكرموش زى الشهداء من طبقات أعلى !


د- يحيى محمود : الفقراء أولا فخ للثورة ، واستكمال  الثورة أولا ! 


مداخلة : وحشية الرأسمالية لعبت دور مهم فى قيام الثورة 


حسام : لو فاكرين ان الثورة هى التحرير يبقى كل سنة وأنتوا طيبين ، الثورة من 11 فبراير اتنقلت المصانع والشركات

مداخلة : لازم ناخد بالنا ان أغلب الناس جاهلة ومضحوك عليها !!


أسماء : لازم كلنا ننشط فى اللجان الشعبية فى مناطقنا

وائل : احنا ماشيين مع الناس كتف بكتف نتعلم منهم ، والحركات بتموت لما دورها بينتهى وتصمم تكمل زى كفاية !



حسام : النشطاء مش هم اللى بيقوموا بالثورة الثورة بتفاجىء الجميع ، ولازم ناخد التحرير لمصانعنا وشركاتنا !

ناشط نوبى : لازم تكون قضيتنا أن كل فئات مصر تاخد حقوقها ، بيؤلمنى التضامن مع فلسطين وعدم التضامن مع أهل النوبة المهضومة حقوقهم 


وائل : الاعلام لسه موجه ومشوفناش واحد من بتوع الفئوية طلع يعرض وجهة نظره فى التلفزيون ، الديمقراطية والعدالة الاجتماعية حاجة واحدة !


ديما الخطيب : يمكن تونس كانت الشرارة لكن أنتم بمصر كنتوا جاهزين ، وأتمنى نعمل تويت ندوة عربية لايف ستريم

على الهامش


مقترح بعمل تويت ندوة موضوعها اغتيال النخبة !


اول واحد هتف ضد مبارك فى 2003 جمال عيد !


أول ما دخلت نوارة واحد عمل تويتة : نوارة جاية تبلغ عننا اجروا ! أقدر تاريخ نوارة لكن الشروخ الكبيرة لازم تواجه باعتذارات قوية !


حسام نفى دور الفيسبوك فى اضراب المحلة 6 ابريل 2008 ، لكنى مسمعتش حد نفى دور الفيسبوك فى ثورة يناير ! @mfatta7


عند الحديث عن دور اتحاد الطلاب الحر أغفلت خلود أن غالبيته كانت للاخوان RT @mar3e


عند الحديث عن حراك 2005 سقط سهوا الحديث عن جريدة الدستور وجريدة الغد وتجربة أيمن نور وحزب الغد ونزول الاخوان للشارع بقوة ثم انسحابهم المفاجىء

على حسب ما فهمت علاء مش ناوى يكمل فى موضوع التويت ندوة لكن أرجو يتوافر بديل مناسب لتستمر التجربة :)

آخر دقائق فى الندوة كانت للاعلانات وكان أهمها وقفة تضامنية مع أهالى ماسبيرو الجمعة 1ظ ، ووقفة تضامنية مع على فتوح رئيس النقابة المستقلة لعمال هيئة النقل العام قدام مجلس الدولة يوم الأحد الساعه 10 ص

بعد الندوة كان فرصة جيدة للتعارف  والنقاش الفردى ، سعدت بالنقاش مع ديما  ووائل وعلاء ومرعى بعد الندوة ، وبلقاء تامرموافى وهوارى وأحمد عبدالله وكالعادة مينا ومهاب  ، الطريف انى قابلت (آنسة تعذيب - صاحبة مدونة التعذيب فى مصر ) @nohaatef ومكنتش أعرف انها هى الا لما روّحت ، عيب عليك فى السن ده يطلع منك كل ده :)

تعليقى على نقطة الفقراء أولا ولا استكمال مطالب الثورة أولا 


أكبر عائق قدام الثورة حاليا هو الكتلة الصامتة اللى مشحونة ضد استمرار المظاهرات لأنها شايفه استمرار الثورة بينعكس على حياتها بالسلب مش بالايجاب ! فلازم ثورة سريعة تمس كل ما يتصل بحياتهم ، الضغط لتفعيل الحد الأدنى للأجور فى القطاع الخاص مش العام بس زى الحكومة بتقول ، تعميمه على جميع العمالة المؤقتة ، صرف اعانات البطالة ، البدء فورا فى هيكلة سياسة الطاقة وسحب دعم الطاقة من المصانع وتوجيهه للسولار لتنخفض أسعار المواصلات والخضروات والفاكهة ، تفعيل أجهزة الرقابة على الأسعار عشان ترجع الأسعار لمعدلاتها الطبيعية وخاصة فى المواد الغذائية ، دخول الدولة فورا كموزع للسلع بتكلفتها الحقيقية  لمواجهة المبالغة فى الأسعار ، تطهير القضاء والنيابة فورا لتصل الثقة بالعدالة للجميع ، تطهيرالاعلام ليتوقف عن بث سمومه والتلاعب بعقول الناس ، تطهير قيادات الداخلية ونزول الشرطة للشارع لتقضى على انفلات الشارع باحترام القانون 


كل ده هيحسس الناس ان الثورة دى حاجة حلوة وكملوا ربنا معاكوا ! ولازم نفرق بين الناس الغلابة اللى عايزة تعيش وخايفة من التغيير  ، وبين الشريحة العليا من الطبقة المتوسطة اللى مش حاسة بحد ومبتفكرش غير فى نفسها وخايفة على مكاسبها !


من غير ده لا هيفرق دستور أولا ولا عاشرا ، لأن الانتخابات مش هتكون تجربة مصيرية لناس كتير !


فالمهم نبلور مطالبنا  بصورة واضحة عشان نوصل لنتيجة ، مش يتكرر موقف 27 مايو وكل واحد يتاجر بالجماهير لحسابه ، وأختم بالعامل الفصيح ده ، هيلخص كل حاجة ممكن أقولها !

 ولو عاوز فيديو للتويت ندوة بجودة كويسة افعص هنا من @jan25mina 

ونشوفكوا فى مظاهرة ولا فى تويت ندوة ، والله الموفق :)

شارك : مطالب 8 يوليو : جمعة التوافق واستكمال الثورة ، الفقراء أولا