الأربعاء، 27 أبريل 2011

قصيدة تميم البرغوثى الجديدة يا شعب مصر: النص كاملا




يا شعب مصر اللى سابقه ضحكته غضبه 
 ما يطلع الصبح الا وصحبتك سببه
 يا مخلص الأرض من وحشتها فى الأكوان
 يا حجة الشمس تفضل طالعة ساعة كمان
 مستأذنة وهى مش عادتها الاستئذان
 متونسة بالميدان وبعشرته ونسبه

يا شعب يا مصلى قدام العساكر صف
 يجرى الجريح من ورا لقدام لا خاف ولا خف
 تدوس عليه العربية تحوله لميت ألف
ياللعجب يقتلوه ويتوقعوا هربه
 ياللعجب يقتلوه ويتوقعوا غيابه
 اللى اتقتل لسه واقف هو واصحابه
 ما بهدل الامن غير من ماتوا واتصابوا
 والصبح ما نور الا أّمّا الشموس غربوا

اضرب عليا انا مش جارى يا قناص
 من امتى خوفنا يا ابن الكلب ضرب رصاص
 كل اللى شاف الشهيد بقى تاره تاره الخاص
 الدم صاحى وعنيد ولا تقبلوش تربه

يا شعب ياللى دفع تمن الشوارع دم
 احفظ أسامى اللى ماتوا فى الشوارع صم
 الشارع اللى اصطفى وقصر الاماره لم
 ملوك قليلة الرباية ركبوا واتركبوا

شعب بغزالة اتخنق قلب التاريخ فى يومين
 لابس عباية جحا وهو صلاح الدين
 بيكرم الانبيا ويهزأ السلاطين
 والفجر خيله وحبات الرمال عربه

يا شعب مصر أكم فرعون وفرعونة
 ضربتهم ضرب سجادة فى بلكونة
 ضرب الملوك تربية صالحة ومضمونة
 ما يبقوا بنى آدمين الا اذا اتضربوا

ضرب الملوك مصلحة ، ضرب الملوك تأديب
 ما أحلى الملوك وهى بتجرى فى السراديب
 ولولا ضرب شجرة الدر بالقباقيب
 ما بين أغا وباش أغا كانوا التتار غلبوا

بعدين مبارك فاروق سادات محدش دام
 هو احنا شعب كده مبيعشلناش حكام
 عقبال جيرانا وحبايبنا كمان يا سلام
 لو كل من له رئيس نصحى نلاقيه قلبه

يا مصر لسه ولسه الثورة بلة ريق
 ما ينتهى لك طريق الا ويبدا طريق
 يا شعب مصر تعالى نتفق يا شقيق
 رج الملك قبل ما تنعم عليه بلقبه

رجه كده شوفه ان كان شغال
 واسأل عليه المكوجى واسأل عليه البقال
 أهم حاجة فى صفاته انه يكون يتشال
 متربى عال لما يمشى يلتزم أدبه

بتكون فى أحسن حالاتك لما تبقى مش محكوم
 بتبقى رايق لا ظالم ولا مظلوم
 بعدين ده غبى ايه ده اللى يهددك بالشوم
 يا مخلى ألف احتلال ينزل على ركبه

يا شعب انت اللى كارم كل من حكمك
 الدوله دى عارفه تحكم بس من كرمك
 كشرلها وهى هتيجى تبوس قدمك
 مفيش حاجة اسمها مليون راجل اتغصبوا

سايق عليك النبى ما تقول كفاية يا شيخ
 الملحمة أما تخلص يبدأ التاريخ
 وبكره جايه حروب فيها بكا وصريخ
 وبكره نصرك يخض الشمس من لهبه

سايق عليك النبى ما تقول كفايه كده
 من النهارده انتصاراتك هتبقى كده
 يا شعب مصر اللى رجالته وبناته كده
 حلال عليه لبن العصفورة لو طلبه

سايق عليك النبى ما تقول كده كفايه
 افرح وكمل ومتقولش كده كفايه
 الثورة دى بداية زى الهجرة والميلاد
 الثورة دى بسملة كمل بقى الآية
 مع كل مرة قراية حسنها يزداد
 والآية تجرى تسلم أختها الراية
 من غير نهاية وحتى الوقف مش معتاد
 وبكره أيامنا تبقى حكاية ورواية
 عن ناس يباتوا حفايا يصبحوا أسياد !


25 يناير يا شباب حصل ايه ؟!
 لو قلنا يعنى على الساعه 3 الفجر
 كان حد فينا طول أو جد حاجة عليه
 أو جاب سلاح أو ملايكه بشروه بالنصر 
 كان اختلف فينا إيه عن أى يوم قبليه؟!
نمنا غلابة، صحينا احنا ولاة الأمر
كان عرش مصر ف اوضنا واحنا ناسيينه
راميين هدومنا على شماله وعلى يمينه
طردنا عنه الحرامى غصب عن عينه
ونزلنا ع الميادين فى إدينا شايلينه

بقوا الملوك فى الشوارع والعبيد فى القصر
وف يوم وليلة اكتشفنا ان احنا والنبى مصر
ومصر مش حد تانى غيرنا يعنى يا بيه
وكل واحد سأل طب كنا ساكتين ليه


وشعب مين اللى كانوا الظبط حاكمينه
بدولة شومة ومختومة بختم النسر
وكل واحد قرا اللى كان على جبينه
رفع بدمه يمينه هدية وهداية
 
لو كانت الأنبيا ع المية مشّاية
لاجلك يا مصر مشينا باسمين ع الجمر
يا مصر وافتكرى أصل الدنيا نسايه
الملك ده حقنا ومفيش فراعنة جداد

إفرح وكمل وما تقولشى كده كفاية
الثورة ده بداية زى الهجرة والميلاد
مش بس مصر اتغيرت من وقفة الميدان
فيه مساحة ضلمة نورت فى طبيعة الإنسان


فيه حاجة ف طبيعة البشر

زى السمع زى البصر
زى اكتشاف القدرة ع الطيران
فيه حاجة كانت ضايعة وبانت


خلت الأمة استعانت
عالشقا بالله وهانت
هذه الدنيا على الفتيان
ارقينا وارقيهم يا عم الشيخ


فى حاجة خلت يشمك التاريخ
ينزل عن الوجه الجميل فيبان
فى حاجة أصلا فى الطبيعة 

تدعو للثورة على السلطان

شوف الشجر رغم الحجر 

طارح ثمر زى الخبر وبتعلنه الأغصان
شوف الهوا حب اللِّوا

فبقوا سوا هبَّة لها ألوان

شوف القمر يفضل قمر تحت الحصار
رغم اقتناعه إنه هايموت قبل ما يشوف النهار
تحصل مفاجأة تطلع الشمس ف حضوره
يختلط نورها بنوره


تشبهه ما تقولش واحدة من ولاده
هى معناه وامتداده
واخدة منه الموهبة والبغددة
وعشان كده
لغة يقولوا عنهم القمران


شوف النجوم ما لهاش نظام حاكم
تكسر كلمة العالم
يبص ويبقى مش فاهم
وهو شايفها ماشية بكيفها فى الأكوان


فيه حاجة غامضة بتكتشف
هى اللى بتخلى الحصان اللى اتحدف
من بطن أمه ولسه مش عارف يقف
يقزح ويجرى ويعرف انه حصان


فيه حاجة بتخلى السجين المستكين

فى كل حين اشطر من السجان
فيه حاجة بتخلى القوى عيِّل قوى

وبيتلوى من نكتة الغلبان
فيه حاجة بتخلى عيون الخلق ما تنامشى
وبتخلى المدن تمشى
وتخرج زى كلمة حق 

من غير قصد مابترجعش لو طلعت

وم الأسمنت والأسفلت يفلت فلت نهر مقدس الجريان
فليحذر السلطانُ زحف الغابة
والورد اذ يستأنس الدبابة
داب الحديد من لمسته دوبان


فيه حاجة خلت خطة الموت ترتبك
عابس وعايز يشتبك
خاف من ضحية جاية ناوية تاخده بالأحضان


وإذا بهذا الفجر يا اخواننا اتولد بيننا
وكنا احنا بنستنى وهو كمان بيستنا
واتاريه بس عايز إذن منا وهو فى يميننا
فلما أذنا خد منا وعطانا أمان


يا فجر يا سابق صياح الديك
يا شعب يا مشبك إيديك فى إديك
وكأنها خط الثلث فى آية القرآن
إديت لآدم معنى تانى زاد على كل المعانى
وربنا قال هو ده قصدى وده غرضى
كده بالظبط لا زيادة ولا نقصان



يا مصر و انتى لسه فى البدايات
بكرة اللى جاى اعظم من اللى فات
يا مصر قومى و بصى فى المرايات

كان كل واحد فى الميدان جايب معاه مراية
رافعها للسما
اشكال و الوان كلها مرفوعة فى العالى
صبحت مراية واحدة بتلالى

و بقت يا مصر الارض صورة للسما
لعبة بازل متكاثرة الاجزاء
لما البشر يتجمعوا تبان السما عالارض
و لما البشر يتفرقوا تلقى السما بتنفض

تبقى السما متوزعة جوة الشقق
و تمر ليلة من التوجس و القلق
و ننام و نصحى تانى يوم ترجع سم
ا لما البشر يتجمعوا مع بعض




يا مصر حقك تملكى بدل السما اتنين
واحدة هدية و واحدة تانية صانعها مصريين
يا مصر لو دققتى هتلاقى البراق
بيجر عربية فواكه فى الحوارى الضيقة

شوفى الصحابة و الحواريين على القهوة بيتناقشوا بحرارة
و السما على مد ايدهم مستشارة طيعة و رقيقة
شوفى المساجد كانت تشاور عالسما
صبحت تشاور عالبشر

و تقول اهما يا سما بصى و شوفى
و ابقى قولى لكل صوفى و هو طالعلك
طريق المعرفة اتغير
يوصل م السما للارض
لا يتوه و لا يحير

و شوفى الخلق وسط الموت تقابله و هى بتهزر
فيتلخبط و يتبعتر و سر الدنيا يتفسر
و نعدلها و نوزنها

بقول يا مصر قومى و بصى فى المرايات
فى سما الولاد هما اللى عاملينها
بيشوفوا بعض فى وش بعض
كأنى انا انت و هو انا و احنا الكل

احنا فى مرايا بعض بنصبح صباح الفل
افدى بروحى كل واحد فى المرايا طل
افدى الشهيد اللى بيتبسم
الفجر توب على اده متكسم
و الله اعلم مين من الاتنين فى صاحبه حل

افدى اللى سهران على الخيم فى الطل
و افدى اللى واقف يشتغل فى الظل
و افدى اللى شايل للعناد اشارات
يهدى التاريخ صوب الميدان لو ضل

و افدى اللى واقف هارى نفسه كلام
و افدى اللى يتتريق على الحكام
و افدى اللى رايح جاى ما بيتعبش
و افدى اللى جنبه حط فرشة و نام

و افدى طويل البال ما يتعصبش
و افدى المصاب اللى شوية و طاب
و افدى المصاب بهوى التراب و ما طابش
و افدى اللى صاب البلطجى و ما اتصابش

و افدى المقام العالى فى التحرير
دولة بلا أمرا و شعب امير





اعلم يا هذا الجيل ان الوطن بشره
لو مصر من غير نيل كان شعبها حفره
مش وصلوا بحرين وبنوا جبال اتنين
وف ظرف أسبوعين على خوفهم انتصروا

والخوف ده شىء معروف بيفرعن الحلوف
رزق الملوك الخوف من غيره يندثروا
رزق الملوك بقشيش من خوفنا شعب وجيش
ومفيش ملك بيعيش لو شعبك افتكره

ناس لسه فى العشرين نازلين على الميادين
بيهزأوا السلاطين من غير ما يعتذروا
يا شعب يا مجنون علم شعوب الكون
اللى اخترع فرعون قادر يجيب خبره

يا سادة الايام يا رافعين الهام
من بكرة بر الشام نادر لكم شجره
نادرها تين وزيتون فى القدس ينتظرون
جيش ع الغلابة حنون وعلى العدا ضرره


دافعين تمنها دما
يا امة الكرما
شعبك كانه سما
و الدنيا دى مطره

يا مصر حمد الله عالسلامة
مطر و نازل بدون غمامة
مطر يا سيدى نازل و طالع
كأنه مادنة و الارض جامع

و الارض دى مظاهرة فى الشوارع
تسقى السما جدعنة و شهامة
مطر طالع يقول لربه
الامهات اللى فى مصر ربوا
و يا بنات مصر قوموا حبوا
أجمل ما فى الراجل الكرامة

مطر و طالع عالفجر يدن
طلعت بنات مصر حلوة جدا
فى الحرب و الدنيا نار و معدن
طايرة و شايلة السما اليمامة

25 من شهر واحد
الفين و عشرة و زادوا واحد
كنا ملايين و كنا واحد
حددنا موعد يوم القيامة



قلت لصحابى انزلوا وانا بعيد عنهم
وقلت من بات فى بيته سلم اصحابه
وانا اللى غبت وهما اللى هنا اتصابوا

نزلوا الشباب الميدان وانا بعيد عنهم
كسروا الشباب البيبان وانا بعيد عنهم
خرج الشباب م البيوت وأنا بعيد عنهم
دخل الشباب فى الموت وانا بعيد عنهم

يا موتى قوم امتحنى أعتذر منهم
اشمعنى يا كلب تستثنينى من بينهم
يوم الخطر قبلها ما كنت اجبنهم

يا موت تعالى اعوض غربتى ومنفاى
يا موت تعالى أحاسبك ع القديم والجاى
يا موت تعالى ونتقاسمك أنا وعداى
ولا تطال عزوتى وانا بعيد عنهم




اصل الحكومة قالتلى انت مش مصرى
انت فلسطينى يعنى اجنبى حصرى
طيب يا بيه يعنى بلاد الشام بلاد اروام
اعيد كلام قلته 100 مرة ده يبقى كلام!؟

مش أم هاشم بلدها السيدة زينب
مش الحسين فى الحسين و اللا لازمله جواز
و الا هيختار ما بين مصر و عراق و حجاز
 و المرسى و الشاطبى جم م الاندلس الاتنين
من مرسية و شاطبة ان كانوا مش باينين

فى اسكندرية اجانب و اللا مصريين
أسمائنا هى بلادنا يا حسن و حسين
اسمائنا زى العلم زى اللغة و الدين
اسمائنا هى الوطن له دمنا لو عاز

و اسمى خلالى فى الارض العريضة ملاذ
و عزوة فى كل دار تنطق حروفه تمام
و فى كل دار ليا صحبة و ليا أهل عزاز
 كان نفسى يا مصر يتأكد كلامى بدم
و الدم يا مصر برضه عالمحبة قليل

قالولى بتحب مصر قلت مش عارف
هو الهوا يبأة جارف لما اقول جارف
و اقعد األف اغانى عن جمال النيل
و حكاية الشرب ميت مرة و هرم و نخيل
و الّا الهوا الحق هو اللى يهد الحيل

و اولى شىء فى الهوا يا مصر شيل الهم
ياللى تحب النبى ايدك معانا وشيل
الحب اتقل من اسمه و اسمه نفسه تقيل
و فى التباس المحبة عالمحبة دليل

ما تعرف اللى اصابك عشق و اللا تعب
و الشوق بيقلب مع الحرمان ساعات بغضب
و الصبر بس اما يخلص
بيبقى صبر جميل




يا اهل مصر
و انا اهلى فى مصر عرب
اهلى عزازمة و عشايرة
الخال و خال و الخال

ما بين شراقوة و صعايدة
بدو فى الحالتين
قولولى دول عرب او دول مصريين
او دول الاتنين سوا فى الحل و الترحال

بعدين انا اسمى تميم
و هروح من اسمى فين
مش فيه فى مصر قريش
قالوا البراغتة قريش
من بيت عدى بن مرة
و النسب عمرى

حطوا الحدود و العشيرة واحدة فى البلدين
و سلك شائك فرق من قالوا ليه او ليش
و كنت اطنش لو ان البحث ده نظرى
لكن ده فيه دم سال

و اسأل رفح و عريش
و اسأل ملوك ترهن الأقصى برغيف العيش
و اسأل حدود تحرم المسلم من الحرمين
و اسال فى غزة الوف فى الحرب متحاصرين

و يخيرونى العيال فى حب أب و أم
أنا ابن رضوى و مريد
اسمى تميم من تمّ
و كل دار فى العرب لى فيها خال أو عم
و اللى يقول غير كده بينى و بينه الدم
مين اللى يثبت و مين اللى يجرى



شد الكلام عمته و اختار اعز جواد
و رد قاصد بلاده و الهوى رداد
و ابن الاصول اللى ما يبدل بلاد ببلاد
و الغربة مرة و لو كانت هدومها جداد

فى مصر بعد السفر وجد الكلام معناه
و اهل مصر صحابى و اولياء الله
يا اوليا لسه فى العشرين و فى التلاتين
يستنجدوا المؤمنين فى المأزمة بيكم

يا فارجين الكرب بين العرب عناوين
منعنى عنهم مطار القاهرة و اسمى
و انى لو جيت يقولوا اجنبى مسكناه
مسكنا واحد اهو له مديح فى حزب الله

يتهموا اصحابى بيا مش انا بيهم
و اضرلى ستة سبعة اكون فى وسطيهم
عبال ما خلص الكلام ده
النصر كان مضمون
القلب فرحان و لكن اتعبه منفاه

و هده بعده عن اللى عاش بيستناه
ما فضلش غير انى انحنى حبا و اقول الله
الله افردنى عنهم و جمعهم
لكى اراهم على بعد و اسمعهم
قد فاز فوزا عظيما من قضى معهم




لما تشوف الشهيد تبقى السلامة خجل
وتبقى عايز تقول له يا أخى آسف
طب قول لى بس اعمل ايه، لو يعنى فيها عمل

اللقمة دى لك نصيب فيها باشيلهولك
واشيل نصيبك من القاعدة وكاسات الشاى
لكن نصيبك فى أنفاسى أشيله إزاى
وازاى أشيللك نصيبك من فرحنا الجاى

ساعات ألاقينى باطلب خط محمولك
بعمل فى نفسى كده ليه، لسه مش عارف
و اروح على القهوة أسأل، هو جه وسأل

من قال لك الموت طبيعى يبقى مش شايف
الموت ده شىء مش طبيعى
الموت ده أصله خلل
الأصل فينا الخلود
وهييجى يوم نلقاه

ما تحسبوش الشهيد اداكوا بس حياة
ما موتوش هو وحده اللى برصاصة رماه
ده طخ ابنه اللى لسه ما اتولدش معاه
وطخ أولاد ولاده لآخر الأيام
 موت معاه بشرية كاملة محتملة

عدوا كان فيها كام شاعر وكام رسام
وكام طبيب عبقرى بين الأطبا إمام
وفيلسوف له على حكم الليالى كلام
وبنت نظرتها تشفى القلب من داؤه

فى شعب كامل رحل ما عرفش أسماؤه
في جسم كل شهيد فيه مصر مكتملة
فخلوا مصر اللى فاضلة تعيش كما شاؤوا


 تنوبه : استعنت بتفريغ ايناس عبد الحميد لاكمال الجزء الأخير من القصيدة لذا لزم التنويه :)

هناك تعليق واحد:

aboo_sala7 يقول...

ألف تحية ليك ... مجهود طيب

وإن كان نفسى أعملها كوبي و بيست ... بس من حقك تعمل اللى انت عايزه

تحياتى