الجمعة، 28 مارس 2014

تجميع لشهادات تويبس شهود عيان على أحداث عين شمس اليوم



أولا : شهادة مقيم بعين شمس ملخص سريع للأحداث 7okaha



في عربيات اتحرقت في عين شمس وكانت حرب شوارع لساعات

حوالي ٣ عربيات او اكثر اتحرقوا هناك في عين شمس

الأهالي في عين شمس كانوا في مواجهة الاخوان النهارة والآلي كان سيد الاحداث هو والخرطوش في عين شمس

الاحداث في عين شمس حصلت في شارع احمد عصمت - شارع السلام - شارع صعب صالح - شارع عبد الهادي خطاب ... والاضرار كلها هناك

في اشتباكات حصلت في محيط منطقة منشية البكري بجسر السويس وفي اخبار ان في ٣ حالات وفاة اليوم

سيارات الاهالي اللي هما حزب الكنبه اتحرقت بس خلاص حتي قعدتك في بيتك مش أمان


ثانيا : شهادة على مقتل ميادة عند المزلقان MenaNader


ميادة أشرف صحفية بجريدة الدستور قُتلت برصاصة فى الرأس.. شهادتى من مكان الحدث ما شوفتش أسلحة نارية مع الإخوان ، الشرطة كانت بتضرب بجنون !


تجميع لشهادات زملاء ميادة الذين كانوا بجوارها للفضائيات http://youtu.be/GhKBpcQJXB4

تقرير الطب الشرعي ان مقتل ماري سامح جرجس بطلق ناري في الظهر وليس بطعنات كما ادعت الداخلية http://www1.youm7.com/News.asp?NewsID=1583400

ثالثا : شهادة المشارك بالمسيرة AbD_ElrhMaN0 وبها اعتراف بكل التجاوزات


المسيرة كبيره اوي مشاء الله المسيرة بتضم "المطرية و المرج وعين شمس وعزبة النخل" تكبير :D

لسة من شوية كنا تحت بيت الشهيد محمد شهيد المطريه يوم 19 عنده 14 سنه ووالدته وجدته كانوا بيعيطوا عاوزني بعد كل ده اقولهم مش هكمل !

رايحين الألف مسكن إن شاء الله العدد مهول الله أكبر :)

بنضرب دلوقتي بلطجية طلعوا علينا

في اصابات كتير


ضرب نار كتير بس احنا قايمين بالواجب بردو

بنجري وراهم وف حجات معانا كده طلعت وعاملين احلا شغل :)

ف اصابات خرطوش كتير

خلاص البيت أللي كانوا بيضربوا منه نار علينا الشباب قاموا بالواجب والبيت ولع

ماشي ف مسيرة المطرية يبقي تمشي وانت مطمن خلصنا ع البلطجية خلاص :D

مكملين دلوقتي وكل الناس واقفين ساكتين :D انبهروا من أللي عملناه

في البيت كان تاحته سوبر ماركت كانوا بيضربوا منه وبعد كده طلعوا يضربوا من البيت

بنضرب بيت دلوقتي حدف علينا طوب :D

خلاص البيت الستارة الخارجية ولعت :D

البلطجية ملهمش ديه :D

راجعين تاني مزلقان عين شمس وهنختم هناك :)

بنضرب دلوقتي

الداخليه جت والحي اشتغل

حي كتير ف عند المزلقان داخلية الكلاب

احنا بنضرب عند المزلقان مش ف مسكن

ف ناس معانا بيقولوا  ان ف 4 وقعوا

خلاص الدنيا هديت ونمشي

خلاص مشينا من المزلقان

في بنت استشهدت وف ناس بيقولوا ان ف 4 وقعوا مننا

ياكلاب احنا كنا بنختم وخلصنا خلاص . حسبي الله ونعم الوكيل

هو لازم اي يوم ف مسيرة كبيرة والناس فرحانه يقتلولهم واحد ولا اتنين عشان ينكدوا ع الناس :( الله المنتقم

شوفت بعنيا اصابات خرطوش ف الوش وف البطن غير الحي أللي كان بينضرب علينا

والله مع كل جمعه وكل شهيد بيسقط مابنزدش غير اصرار وعزيمة ومكملين لغايت آخر نفس محناش أحسن من أللي ماتو .

العبيد الكلاب والناس العبيطه بيقولوا إن الإخوان هما أللي قتلوا الصحفية! يعني يعبط لو احنا أللي قتلناها مكناش شلناها واسعفنا لغايت لما توفت



وشهادة آخر كان موجود بالمسيرة realsadeagle


 … ريتويت جامد عاوز الكل يشوف كلاب الداخليه وقتلهم لنا بالمدرعات في عين شمس 

شوفتها المدرعات كانت جايه من خلف المسيره بسرعه ضرب نار عشوائي من المدرعات نا كتير ستات ورجال سقطوا من أصابات:-(

شوفت كمان واحده الناس ال في المظهرات شلوها كانت عربيتها اضربت برصاص من مدرعات الداخليه حالتها خطيره

الضرب كان المدرعات بالالي و الخرطوش من المدرعات الجت من الخلف مكنش في قناصه

ضرب النار كان عشوغئي علينا وكانوا جايين يقتلوا مش يفضوا مسيره وخلاص ..الداخليه قاصده تقتل

الداخليه هجمت علينا من خلف المظاهره ومضربوش غاز ضربوا رصاص حي و خرطوش من ضهرنا انا كنت بسمع صوت الرصاص بيعدي جنب وداني

ضرب الرصاص كان بيجي من المدرعات وانا كنت في حتي قريبه من المدرعات و شوفت ضرب من الالي علي المسيره بقصد  قتل الناس



رابعا : شهادة من ساكن بشارع أحمد عصمت MohebEmad


فيه مدعكة في شارع احمد عصمت في عين شمس بين مسيرة الاخوان واصحاب المحلات والاتنين بيضربوا خرطوش

دي مبقتش مسيرة دا بقي تبادل اطلاق نيران وولاد الوسخه بيضربوا نار علي ولاد الوسخه التانيين اللي بيضربوا نار برضو .. ياكش يولعوا

اصابات كتيرة من جانب ولاد الوسخه (الطرفين)

ماهو اما مسيرة تهتف "البلطجية ملهمشي دية .. زي الداخلية" واربع عيال منهم يضربوا خرطوش في الهوا ، يبقي ازاي الوم الاهالي اللي ردوا بالبلح !!

اقولكم ايه ، انا حاضر الاشتباكات بتاعة مسيرة الاخوان في احمد عصمت عين شمس وهم اللي جروا شكل الاهالي و الطرفين وقع منهم ناس كتير

وبعدين لما يطلع اربعة لابسين ماسكات نينجا ويضربوا خرطوش من وسط المسيرة انا ازاي الوم اصحاب المحلات اللي ردوا عليهم بالخرطوش !!

وحيااااة امي انا لا شفت اللي بيحصل عند المزلقان ولا اعرف مكانه انا بحكي عن "احمد عصمت" واشتباكات الاهالي مع الاخوان لحد كنس المدرعات


خامسا : شهادة من مراسل صحفي ساكن بشارع أحمد عصمت "شهادته كساكن بالشارع وليس كمراسل" KareemFarid


الأعداد اليوم بـمسيرة الإخوان في منطقة عين شمس, مهولة بكل ما تحمله الكلمة من معنى, معظم المتظاهرات منقبات أو مرتديات للخمار الأسود ومعظم  المتظاهرين ملتحين وعدد ليس بقليل من الشباب الذين لا تظهر ملامحهم إن كانوا إسلاميين 

"تفويضكم جابنا لورا .. يا عبيد يا ولاد المرة" .. هتاف متظاهري الإخوان قبل وصول مدرعات الشرطة إلى شارع احمد عصمت بعين شمس

تبادل إطلاق النار بين الإخوان والشرطة في شارع أحمد عصمت, وفرار أعداد كبيرة من المتظاهرين إلى الشوارع الجانبية.. 

في مجال رؤيتي, لا توجد اشتباكات الآن في شارع أحمد عصمت في عين شمس, بعد فرار متظاهري الإخوان ومطاردة مدرعات الشرطة لهم

صورت فيديو لمسلحين وسط الإخوان .. هعمله أبلود بالليل

ابقي استني شوف الفيديو قبل ما ترمي كلام فيه إيحاء أني بنقل صورة منقوصة :) انا صورت لنفسي ومن بيتي واللي تحت بيتي وبس

انا مكنتش بغطي الأشتباكات لأي جهة، مسيرة عدت من تحت بيتي صورت اللي شوفته وبس، ونقلت كل اللي شوفته

لو عايز تعرف اكتر عن خلفية الأشتباكات فده اللي عمله الاخوان من اسبوعين    

انا كنت في احمد عصمت، المزلقان بعيد عن مكاني تقريبا 2 كم، ماشوفتش وكنت موجود بحكم مكان اقامتي مش لشغل

مسيرات الإخوان بتمر في عين شمس أسبوعيا بانتظام، عادة بتكون الأعداد محدودة، وفي اتفاق مع بلطجية المنطقة لتأمين مسيراتهم، لكن من اسبوعين .. 1

حصلت اشتباكات بينهم وبين اهالي المنطقة وضربوا نار علي الأهالي قبل وصول الشرطة وتبادلها لإطلاق النار معهم وفرار معظم المسيرة .. كما هو موضح 2

في الفيديو ده ،تبادل الرصاص الحي والخرطوش بين الإخوان والشرطة في…:   3

اليوم مسيرة الإخوان كانت باعداد كبيرة جدا عكس الطبيعي، وكان في تهديد للأهالي من انهم يتعرضوا للمسيرة، وصورها هنا  4 https://www.facebook.com/journalist.kareem.farid/posts/707600992595807?stream_ref=10

 بعد مرور المسيرة بالكامل من تحت بيتي، وصلت مدرعات الشرطة والمسيرة اتفرقت في الشوارع الجانبية، وهنا اختفت الاشتباكات عن مجال رؤيتي من البيت 5

انا بكتب شهادتي عن اللي شوفته ومحدد موقعي في شارع احمد عصمت، بعيد عن عزبة النخل بحوالي 2 كم، وماشوفتش ولا اعرف ايه اللي حصل هناك 6

عين شمس مش مكان صغير عشان تعمم، المسيرة عدت من احمد عصمت لشارع عين شمس وصولا لعزبة النخل والمزلقان، مكان استشهاد ميادة علي حد علمي

من فترة ومتوقع تحصل مجزرة، لأن الأهالي والبلطجية والإخوان مسلحين سلاح محلي الصنع وسلاح آلي وبنادق خرطوش، وفي تربيطات بين الإخوان والبلطجية

بدل الهري في عالم افتراضي، ممكن تنزلوا المنطقة وهتعرفوا ان في عائلات كاملة مهنتها البلطجة وبتاخد فلوس مقابل حماية الإخوان، ومعروفين للمنطقة

هو ليه ناس بتدور علي إثبات ان طرف قاتل والتاني مظلوم؟ سواء الشرطة أو الإخوان أو البلطجية التابعين ليهم، كل أسبوع بيقتلوا ناس، كلهم مجرمين

فيديو يظهر مسلح بين متظاهري الإخوان في أحمد عصمت, عين شمس:   via


سادسا : شهادة ساكن بشارع عبد الهادي خطاب موازي لأحمد عصمت fedooahmed


في ضرب نار كتير فشخ عندي فيي الشارع سامع صوته بس مش فاهم اي حاجه  

ضرب نار وطلقات الالي والعاب ناريه والدنيا خربانه تحت البلكونه  

اي حد ناحية عبد الهادي الموازي لاحمد عصمت يمشي فورا .. الشرب في الوش وألي   ضربوا علينا احنا كأهالي كمان

ابويا قفل البلكونه واقسم بالله مش راضي يفتحها

الصرب تحت ببيتي ومش عارف ابص من البلكونهطلعت فوق السطوح .. الضرب في الوش والي

احا ضربوا علي فاحترمت نفسي ودخلت

اخوان وشررطه ... الناس في حالة رعب بجد

الاتنين انا تحت في الشارع الاخوان معاهم سلاح والشطه بتضرب باللالي

احا الشرطه انسحبت مفيش ولا فرد شرطه بقت اهالي واخوان س وضرب النار مهديش

اهالي عين شمس نزلت بالسلاح تحت بيووتها بعد ما اتصلوا بالقسم وقالولهم احموا بيوتكم مالناش فيه  

واحد صاحبنا اسمه كريم اتوفي بطلقه من سلاح الاخوان ولا ليه في السياسه ولا في اي حاجه  

مجزرة  

جزء من تلفيات ما بعد المعركه   



أنصار الإخوان يقتحمون شقة بعين شمس ويضرمون النار بها   via  بس اتفشخوا بعد الحركه دي

 منذ قليل صوره توضع مدي معاناة الشارع الذي اسكن فيه 





اللي مش مصدق يتفضل يجي بنفسه عبد الهادي خطاب من الف مسكن .. موازي لاحمد عصمت  الاخوان قتلوا 3 وكسروا محلات وعربيات

   الناس ملمومه تاني تحت البيت وبيجهزا الطلق الحي ومستنيين الاخوان عشان حد قالهم انهم جايين تاني علي هنا 

دي صوره لكريم محمد سلامه قتلوه الاخوان النهار .. كريم كان من اطيب الناس اللي ممكن تقابلها في حياتك  



سابعا : شهادة ساكن بأحمد عصمت Am7asan وردوده على صاحب الشهادة السابقة


اصوم اصوم و افطر على طلقة بسبب مسيرة للاخوان و اتحسب اخوان !! 

كان زماني زيك يا ميادة جثة بينهشها كل كلب استغلالي..الحمدلله

 طب مش بالمرة نقول ان الداخلية ضربت نار من غير خطوات تحذيرية ف احمد عصمت ؟؟ ..

 كلامي مش معناه اني ضد شهادتك .. هما كانوا ماشيين يرخموا ع المحلات و يجروا شكل الناس و يستفزوهم

انا ضد التعريص ف المطلق حتى لو بدون قصد من اللي بيعرص

و انا بقى كنت بيضرب عليا نار لمجرد اني واقف بشتري لحمة من الجزار ..و بلاش نكمل عشان ماقولش كلام يزعل

 كدة انت بقى مصمم تعرص .. روح بعيد عني بقى بشرطتك الملايكة .. انا خلقي ف مناخيري و داخليتك كانت هتخليني محسوب اخوان

 هتعرص لحد ف يوم .. هيتعرص عليك لمصلحة نفس الحد ف يوم تاني

لما تحكي يبقى توصف الصورة كاملة دا مايعتبرش تعريص لحد .. انا ماقولتش الاخوان ملايكة و ايدت كلامك بس مش هعرص للداخلية

الداخلية ضربت عشوائي على اي حد لمجرد انها شافت اهالي رفعوا علامات رابعة مش مشاركين اصلا ف المسيرة

اللي دخلوا لكم ف السلام و خطاب كانوا بيجروا من ضرب الداخلية ف احمد عصمت على فكرة .. و انا شوفت الداخلية بعيني اللي ماقدرش اكدبها

مسيرة مسلحة و ملثمين كمان .. هما من امتى كانوا بيمشوا بمسيرة من غير سلاح !!

انا شوفت الفرود الخرطوش معاهم على فكرة و عارف انهم كانوا مسلحين..بس انا عارف اية اللي هيجهم و شوفته

العيال اللي كانوا ف المسيرة ماشيين يستفزوا الناس ف الشارع..و الداخلية هيجتهم لما فتحت النار من غير حتى تحذير انا كنت ف احمد عصمت

استفزوني انا شخصيا .. و عيال سنهم مايتعداش 16 سنة

هما من غير حاجة كانوا بيقولوا ف هتاف اللي هيبلطج ملهوش دية .. مع ان محدش اتعرض لهم .. و يشيلوا سلاح لية اصلا ؟

_____

آخر تحديث السبت 29 مارس 3 م 

تجميعي: أحمد العش

ليست هناك تعليقات: